越北牛肉粉專門店

營業中

休息中

早幾晚去了紅磡，諗唔到食咩好，行過門口見到佢啲餐牌都ok，於是就入去試吓。餐廳裝修同一般普通餐廳一樣，無咩特別。點了一個生牛肉湯河配炸春卷、香茅雞扒湯河配海哲沙律、兩杯三色咸檸七。先講個生牛肉湯河，啲牛肉普通，無咩特別，不過牛肉較為少咗啲，多返少少會滿足啲。河粉食落去同一般無咩分別，個湯就咸咗少少(不過唔知越南菜係唔係咁)。另外個香茅雞扒湯河，啲雞扒都熱辣辣同塊皮都幾脆口，應該係即煎(唔似預早煎好翻熱)，不過唔係好食到香茅味。到兩款小食，先係炸春卷，食落都係熱同脆口，都唔係預早炸定，同埋入面啲料都幾足。至於個海哲沙律，第一次咁樣食海哲，同平時一般食開嘅有啲唔同，硬身啲，咬落口有啲似牛筋，同埋酸酸哋，都幾開胃。至於兩杯三色咸檸七，略微唔夠酸同咸(已經有督到檸檬同埋咸檸)，飲落去好似同七喜分別唔太大。整體嚟講唔算太突出，不過講句公道話，佢又唔係貴，以呢個價錢嚟講係可以接受。