路邊煱 (已結業)

仲記得上次嚟食完個雞煲，先發現原來有個招牌花甲蟹鍋。今次再嚟幾大都要試試佢。餓住個肚等火鍋，當然係要點啲小食先啦。呢個黃金豆腐，外脆內滑，最過癮就係擺耐左都無出水，正。另一個小食，醒胃涼伴雲耳，個汁幾好，可惜芥辣味幾強，唔係個個朋友都啱食，不過我個人就幾鍾意。湯底到，蟹湯原來係配番茄湯底，感覺好清甜，比起平時番茄湯更清甜，花甲同蟹都好有海鮮味。未開始打邊爐已經一人飲左兩碗湯。響鈴係自己炸，脆得嚟又夠薄，吸湯力好強，放一放湯既話要快快手。呢個豚肉好特別，大大塊，用豬扒位薄切，帶有少少肥，夠薄身一啲都唔韌仲好有肉味。肥牛有兩種，一種係安格斯，一種係本地，鍾意肉味既當然揀本地，有咬口啲，如果要焾身同埋油香，就食返美國牛啱啲，至於我就梗係雙拼最正啦！釀油炸鬼，本身已炸到卜卜脆，建議先試就咁食，再試放湯。呢度炸得啱啱好，油炸鬼唔會因為返炸而太老。個人覺得呢個就咁食好味過放一放湯食。