早安越南 (已結業)

生蝦片既大細屬於可接受程度，試食第一隻既時候，口感出乎意料的有咬口，唔似一般既越南食店口感鬆散，而味道方面屬於中上水平，鮮甜且不帶腥味，個人認為係鋪頭必選食品之一。手撕雞凍檬粉，手撕雞既調味做得好好，少鹹帶辣，有開胃作用。而旁邊既札肉，味道唔錯，但個人略嫌清淡，至於個檬粉正常水平，分量十足同有咬口，所以手撕雞凍檬粉亦係鋪頭入面其中一個必選食品。酸辣海鮮湯黑粉絲，份量一樣都係好夠，黑粉絲有啲米粉咁，比較爽口。啲海鮮都有佢既鮮甜味，但佢個湯對我黎講有啲太甜。而椰汁沙冰帶點濃郁既椰子味道而且比人口感唔會口寡寡，配搭越南菜一流。咸檸梳打就好正常，無咩特別。