公和荳品廠

營業中

休息中

孩童時代住响深水埗，算係見證過香港最地道嘅街頭美食輝煌年代。傳統美食價廉物美，重質素，重口碑，全手工製造百分百嘅誠心誠意。鮮打魚蛋、脆皮燒鵝、缽仔糕、豆腐花。以前住响深水埗唐樓，夏天跟嫲嫲去樓下買餸，行到身水身汗，最鍾意食公和嘅凍豆腐花配冷凍豆漿，公和陪咗我屋企人四代人。佢樓底好高，即使冇冷氣都涼浸浸，地方小，座位唔多，而家租埋隔離鋪，堂食地方就多咗好多喇！公和係一間豆品店、賣豆腐、豆漿、豆卜、芽菜、腐乳。以前公和嘅豆漿，豆腐花嘅豆味好濃，特別係豆腐花有熱有凍，凍咗都唔嚡口，係夏天嘅消暑妙品！煎豆腐都好香脆，簡單醮上豉油，甜醬已經好好食。之後有炸豆卜，又香又脆，同樣出色！但好可惜，最呢十年嘅質素素真係愈來愈差，可能係材料唔同咗，或者製作人變咗啦！豆腐花嚡口，豆漿冇味，連衛生都差咗，張枱甜笠笠，服務就咪提啦！但價錢就愈來愈貴！係咪紅咗，有名氣咗就忘記初心呢！