煌爵宴會廳 (已結業)

之前在九龍灣展貿13樓嘅煌爵食過幾次，都係公司annualdinner，覺得唔錯，所以母親節晚飯，帶咗屋企人嚟慶祝。位置係呢間酒樓最大問題，本身展貿已經偏僻，仲要搭lift上頂樓，出lift要轉個彎先到，沿途都係圍咗hoarding，好彩有箭嘴指出方向。入到門口被巨型嘅水晶吊燈吸引，裝飾都係for婚宴場地，有中式酒樓嘅氣派，亦有西式餐廳場地嘅精緻，呢種中西合璧，似乎都好適合今時今日新人嘅要求 行上一層樓梯，就會發現酒樓分咗兩個宴會廳，我哋被隨機安排入咗其中一個。坐向窗邊，其實會望到郵輪碼頭嘅海景，可惜出面太黑，入面太光，睇得唔清楚，相信午市嚟到嘅話，畫面會更加震撼。當晚除餐牌上面嘅嘢食，酒樓亦都有唔同款類嘅特價小菜。首先叫咗個陳醋木耳。陳醋嘅酸味，加上木耳滑順嘅口感，係上佳開胃小食。木耳本身嘅營養價值都好好，可以改善高血壓，所以不時食一些都唔錯。餐牌寫係拔絲鳳梨咕嚕肉，不過上到碟就冇咩拔絲嘅效果，收據寫嘅係鳳梨咕嚕肉。如果一心想睇拔絲嘅效果，可能就要失望呀。但以咕嚕肉去評價，的確又唔錯，個汁酸酸甜甜好開胃，肉嘅份量都好足夠，肉質有彈性。北海道元貝泡米線係一個比較少喺中式酒樓見到嘅食物。