孔夫子 (Club East洞天) (已結業)

有次經過見到呢間野，walk in 食唔到，上星期就專登卜檯去食。首先要讚下佢啲位好闊落，唔會好似變相搭檯果啲餐廳咁迫，坐得好舒服。冷盤叫咗酥皮茄子，睇落好工整，似一舊大蘑菇多過茄子，當然食落真係茄子黎嘅。炸皮做得薄脆，冇油益味，茄子亦冇乜索油。味道黎講唔係特別出色，但係幾啱冷盤攞黎開胃而唔應該食滯嘅原意。主菜叫咗個檸檬汁炸蝦球，放一塊檸檬喺底一條蘆筍喺面，幾好睇，不過唔理解佢扮緊乜。食落味道相當出色，檸檬汁雖然做得偏甜，酸味唔夠，但配大件炸蝦球仍然相當好味，我連續食咗3舊，係完全冇膩感。食到第4舊開始有少少嘅，咬塊檸檬就消到滯。主食係銅盤沙薑雞飯，飯焗出黎嘅火候幾好，係老友記講果種「蝦仔米」黎，通常呢種做法嘅飯，大家梗係會爭住食餸下面塾底果啲飯嘅，比我爭到（小小啦），但係只有沙薑味而冇雞味。當然因為沙薑味本身太搶，飯冇雞味係非戰之罪黎嘅。雞本身都嫩滑，有少少雞味啦，去骨上我自己就唔太好，不過都係好味嘅。埋單4舊水咁上下，整體黎講我會揀呢間好過去同價位嘅酒樓。