柳園菜館 (已結業)

星期六去歷史博物館睇展覽，多人到嗨嗨，順便去呢間有螺螄粉食嘅中菜館試吓。一上到去，哇，會唔會又少人得滯，真係貫徹到我包場嘅作風。嗌咗碗螺螄粉同埋醉雞set lunch，螺螄粉有浸舊式士多嘅氣味，有啲人覺得臭，但我又幾中意聞。食落只係一碗好普通嘅辣米線，仲要米線份量好少添。佢啲配料種類係多，但係份量唔夠喇，如果落多一半酸豆角，碗野一定惹味好多。加咗十蚊要個豬肚做餸，真係少到試食咁喎，口感亦都太腍喇，冇豬肚應有嘅彈牙，唔合格。至於醉雞飯，佢個整法好特別，係落咗桂花糖水嘅，基本上係比甜味冚過咗大部分嘅酒味，對香港人口味黎講，應該唔太討好，我就覺得還可以啦。連埋罐可樂，埋單120有找，其實算平，但見佢星期六都咁淡，相信比較難捱。