閩港小廚

營業中

休息中

福建炸雞卷同土筍凍，聽就聽得多，香港比較少地方有得食嘅，有一晚行北角發現呢間野，仲要10蚊件土筍凍咁平，就梗係入去試吓。原來佢個形狀成舊砵仔糕咁，又整得幾有喜感，我諗其他地方嘅土筍凍唔係呢個形狀？其實成舊野係冇乜味嘅啫喱黎，靠少少醋黎提味（果然係冷盤吓），啲土筍口感似蜆肉，有好輕微嘅腥味啦，唔算係好食，但都過得去。雞卷真係有啲失望，其實只係肉碎撈馬蹄做餡嘅炸物黎，都足料嘅，不過口感唔豐富，食完會覺得酒樓嘅雞絲炸春卷先至係王道。反而因為想試多樣野，而同雞卷做雙拼嘅炸醋肉係幾特別。佢有啲似上海排骨嘅做法，但上海排骨咸而炸醋肉酸，醋味其實好中和到食炸物嘅膩感，所以食落幾清新。我諗如果可以同上海排骨撈埋黎食就好玩喇。最後嗌多個大路嘅炒粉絲做主食，炒得算有鑊氣，但都係唔夠味，要撈啲豆辦醬先好食，可能呢間野整體都係走清淡路線啦。