札幌元祖北海道拉麵 (已結業)

上一次幫襯呢間鋪頭應該係五年前，今次再去就好失望叫左一個芝士鹽牛油鹽味湯嘅拉麵，但係個湯好似就咁用熱水加鹽咁，好冇誠意。個麵就好似喺超市買嘅即食拉麵咁……另外，叫左一個濃味拉麵，賣相及味道一般。每張枱order拉麵可以贈送一客三隻餃子。張coupon其實係喺入口有個傳單阿姐派嘅，但阿姐冇提過佢手上傳單係有coupon， 只係不斷話 “食拉麵送餃子”， 我諗住反正餐廳入面有餐牌，環保d，所以冇攞到傳單。點知，店員話要有coupon先有餃子送， 結果我又要上返地面問阿姐攞嗰張傳單。 個阿姐喺度笑笑口咁單打，話“頭先畀你又唔要，而家又要!” d態度呢……另外，舖頭內只有兩個店員， 其中一個經常去玩電話， 所以極度唔夠人。我叫左兩次加水，十分鐘後都冇人嚟幫我加水，結果我要自己去斟水。咁嘅服務水平，都要收加一服務費，真係有啲無奈。 銅鑼灣仲有好多價錢差不多嘅拉麵店選擇，我諗我以後唔會再返去。