蘭芳園 (已結業)

某日一早要喺上環信德嗰邊做嘢，想快快脆脆食個早餐，除咗連鎖快餐店之外，蘭芳園都係一個好嘅選擇。疫情關係，一路封關咁耐，大家都可以想像到信德中心呢邊冇晒船去澳門之後，會有幾冷清。我諗除咗喺附近做嘢嘅人會嚟呢度食早餐之外，應該都唔會有啲咩街客㗎啦。佢個奶油豬都烘得幾脆，同埋煉奶牛油都幾足料，所以都好味。至於隻炒蛋就，大家睇相都應該睇到，一啲都唔滑，自己屋企炒都炒得好過佢洋蔥雞扒就冇乜特別啦，正常味道。不過其實我嚟食蘭香園，最主要都係想飲杯奶茶！佢杯奶茶係我喺香港飲過數一數二好味嘅奶茶，啲茶香得嚟又有少少苦澀味，再加埋啲奶又幾滑，總之就正啦！