江戶前日本料理 (已結業)

　　星期六開 OT，老婆先去搵位。事前唔知道開咗呢間食店，行到去門口仲要嚇親，因為好多人等位。　　但地方大，流量都好快，我食到一半，已經見啲枱唔爆喇。　　老婆就鍾意一上樓梯就見到有大大條三文魚喺度，視覺上令人食慾大增。　　唔知係咪唔好彩，叫咗幾個餸，賣相都係唔吸引。不過，食落去又無比想像之中咁差，壽司嘅餸，三文魚同帶子都好新鮮；雞軟骨即整，熱辣辣所以好食；天婦羅亦係熱辣辣，而且好在啲粉唔會太多；唯獨個烏冬我覺得有少少怪咁，可能食唔慣「撈」烏冬嘅關係啩。　　每個服務員都好賣力去做嘢，但係就人手始終唔夠。枱面有部機俾客人去按鈕，分有：落單，加水，賣單，等等，但按極都無人埋嚟，只有傳統咁去叫行過嘅服務員提供服務。　　最恐怖係一坐低就聽到服務員同行緊上樓梯嘅客人講句：「孖衫啦些」。但我諗香港人都已經聽慣晒。