班戟館 (已結業)

呢間食班戟嘅自從落戶虹橋之後，經常都見到佢門口大排長龍，所以諗住等佢少啲人先食。前幾日幾彩，食完米線過去咁啱唔洗等位。隻碟好可愛，見到已經好興奮。焦糖脆脆海鹽焦糖可麗餅，一食落口已經有驚喜，可麗餅好香，個海鹽醬亦調得啱啱好，個脆脆亦都整得夠碎，焦糖同海鹽嘅味道夾埋好好食，互相襯托。曖昧-梳乎厘配士多啤梨味嘅醬同雪糕，梳乎厘好鬆軟香蛋白味，配埋啲醬酸酸地，好開胃之餘，味道啱啱好。食完上面兩個覺得好好食，再叫左呢個伯爵茶蘋果醬可麗餅。蘋果嘅伯爵茶味比較輕，加埋雪糕同可麗餅就會比掩蓋左，不過味道都係好嘅。3個人食除返開每人6x蚊，甜品黎講其實幾高質，雖然價錢唔平，但仍對得起個價。