小巴黎越南餐廳

營業中

休息中

一向對小巴黎無乜興趣，就算係屯門市廣場時都無諗過試，一係對越南菜無興趣，二啲裝潢令我好似油苙苙烏糟糟咁。今次係朋友建議下食，原來比想像中好。入舖時已經九點多啲，入面客人九成滿，我地要搭枱，環境唔算乾淨，張枱仲未清，好在阿姐一叫就過黎抹乾淨。由於我地都唔太餓，就各自叫咗豬扒飯同扎肉雞絲檬，加個椰青同珍多冰。飲品先上，珍多冰椰漿足，只係青色條條滿足唔到貪心嘅我，試椰青，好-大-問-題！完全唔凍，好懷疑有無雪過，印象入面，椰青=冰凍解渴，真令人失望。我嘅檬粉黎到，分量算多，扎肉同雞絲都足料，扎肉切幼條睇落多啲我又可以同雞絲一齊食，雙贏，滿意！朋友嘅豬扒飯一到，我嚇咗跳，原塊豬扒上，大過手掌，上面有大量粗粒葱油，好葱嘅朋友應該鐘意，我就會低能走青，試咗朋友比嘅豬扒，味道唔太濃，軟熟，唔錯。一路食一路吹水，到十點走剩幾個客，好似就收舖咁，就問侍應阿姐幾點收，佢好親切咁答十一點，叫我唔駛擔心慢慢傾，真係令我感動。今次算係改善咗我對小巴黎嘅印象，雖然未算勁乾淨，但都算ok，因為今次係食碟頭飯麵，價錢唔算貴。未知餸菜份量味道同抵食與否，要投訴嘅只係個室溫椰青，而親切阿姐又加番分，係咁。