走肉蔬食研究所 (已結業)

本身對連鎖以外嘅素食小店餐廳唔抱太大期望，不過我想食清啲又就腳，所以揀呢間。呢間都係比較出名嘅黃店素食餐廳，我都係第一次試。環境比我想像中大，果時我哋比較早嚟到食lunch ，所以未去到坐爆人嘅情況。呢度同快餐店一樣，要去收銀處俾錢買嘢食，然後等拎餐，而食完就要自己拎返餐盤過去回收嘅位置，另外可以自己去添啲配菜好似生菜、蕃茄仔、粟米等等，完全係自助式。食物係有啲驚喜嘅，佢又有好多蔬菜，對於素食者或想追求健康嘅人嚟講係唔錯嘅選擇，令我對素食嘅好感度又高咗啦！1.泰式綠咖哩雞拌麥香抓餅個量好大份，差唔多等於一個普通男仔嘅食量，抓餅成個大手掌咁大，本身唔會太乾太硬，咖哩雞得2、3舊，但口感同味道同真嘅雞好似。又有薯仔、三色椒、蕃茄仔，超豐富。2.三色海鮮焗飯佢裡面有蟹柳、魚柳等等，食落嘅仿真度都好高。好飽肚嘅一餐。