誠記小籠包拉麵 (已搬遷) 新店位置

熊妹電話📲plan就黎完約，今日唸住去電訊街比較下啲電話plan再續埋約。所以揾埋肥媽同卡肥哥哥落去一齊食野喇。熊妹想食上海野，揾到呢間民間美食《誠記小籠包拉麵》。欽洲街呢間係分店，醫局街係總店。今日落好大雨無停過，門口有遮架擺遮的。內裡裝修好簡樸，就擺放著幾張木枱木櫈，民間風味重啲。呢度的上海菜款都幾齊，小籠包、生煎包、鍋貼、雲吞、水餃、菜飯、粗炒、炒年糕，真係應有盡有，全部都岩哂熊妹心水。咩都叫哂去！招牌生煎包$29四件，係欽洲街限店喎，好似幾出名，試下先。熱辣辣煎起架，黑瓷碟上保持熱度。包底煎得好脆，好味喎！包皮唔會好厚，小心！一啖咬落去，入面啲肉湯汁爆哂出黎，好辣口呀！好正好正呀！肉饀都唔細舊，調味幾好，又無咩肥肉，岩哂熊妹喇！不過食的時候真係要小心啲湯汁辣親咀，或者灘凍少少先食。跟住係熊妹去上海店必食的酸辣湯水餃🥟，$48。超級大碗！超多料，木耳，豬肉絲，豆腐，豬肚，味道好夠，酸酸辣辣，湯質感好濃稠，唔會好稀，真係好好味！而水餃有6隻，係菜肉餃，餃皮好薄，菜多肉少，唔會話成舊豬肉好肥膩，岩哂熊妹喇，成碗酸辣湯水餃真係超讚喔！卡肥要食主食，睇中左上海粗炒$48，加回鍋肉$10。