666泰船麵 (仁愛街) (已結業)

九龍城多泰國菜就係人都知，其實行遠少少，去到新蒲崗亦有泰式小店。入去前見到有好多明星相，但背景好似唔係呢間分店。坐低見到投影機上播出中國好聲音歌曲，唔知係唔係隨機播放，有時會播出一兩首紅歌，MV有陸軍果種。講返食物，船麵湯底濃郁，配料亦都好豐富，細細一碗就已經有雞絲、雞腎、雞腳、炸豬皮、蘿蔔、菜。份量多可以食多啲其他小食。另外，烤山豬肉串食落較林，味道偏甜，不過勝在肥肉唔多，成串都可以食晒。而生菜包肉碎味道好香，可惜炒得不夠乾身，部份生菜有啲爛，無法包住肉碎。整體嚟講，菜色味道尚算合格，但氣氛真係好古怪，都係返九龍城聽泰文歌好啲。