香港賽馬會滿貫廳

營業中

休息中

上次爸爸生日去咗鋸扒，今次爺爺生日當然要食下中餐啦！滿貫廳平日下午除咗點心外仲有唔少特色小菜同中式飯麵～蘿蔔絲酥餅外層鬆脆，蘿蔔絲清甜；蛋撻酥皮層層鬆化，蛋漿滑溜充滿蛋香，係餐廳嘅熱賣之選亦係我最鍾意嘅；菠蘿雞尾包焗得好靚又多餡－全部都熱辣辣好好食呢！蒜泥白肉擺盤幾精緻，唔好俾佢紅卜卜嘅辣油嚇親，食落好惹味但其實唔太辣。火焰叉燒皇個名夠晒霸氣，上菜時侍應會淋上酒再點火，有畫面又有香味。叉燒用到梅頭肉，食落好腍肥瘦均勻，有少許燶邊，仲有而家好少見嘅蜜汁蠔油豆伴碟。烤鴨有二食，片皮鴨係即場片既，水準唔錯，配上薄薄嘅餅皮同經典嘅青瓜絲京葱同烤鴨醬，食得好滋味。第二食嘅鴨崧生菜包亦都炒得幾香口，配搭新鮮爽口嘅生菜食落冇咁膩。酒樓嘅揚州炒飯真係特別出色－炒飯粒粒分別唔油膩，用上大大隻嘅蝦同足料嘅叉燒粒，味道好豐富。餐廳送嘅壽桃包係傳統嘅蓮蓉餡，細細個冇咸蛋黃，餡料唔會好甜。