滿江紅小甜甜 (已結業)

間唔中都會食下滿江紅小甜甜，都食咗五六年，次次都叫好多嘢，今次兩個人食只係叫咗個涼拌土豆絲同埋水煮烏江魚鍋。以前食開酸菜魚同埋蒜泥白肉，間唔中都會好懷念，今次一是新野就出事。涼拌土豆絲係前菜，醋味比較重，我本身唔食醋所以唔太喜歡，欣賞啲土豆絲切得好幼，口感好似食緊麵，又唔算太辣同太咸，係一個唔錯嘅前菜。水煮魚非常之辣，辣到食唔到魚嘅甜味，每一次都好驚畀辣油辣親，忍唔住叫咗杯司樂解辣。第一次烏江魚，冇咩特別，魚味唔出質感亦偏硬，都鍾意食桂花魚多啲。配料有啲青瓜、金菇、粉絲同埋芽菜，但係由於實在太多辣油，所以都唔係好食到。成個窩好大兜，兩個人食真係食唔晒，人多的話叫碗飯應該唔錯。