永華日常 (利東街)

營業中

休息中

今日收工黎左永華日常食埋飯先返歸，點左個鐵板套餐，係美式雜扒，跟飯，意粉或薯角，配燒汁或者黑椒汁，配羅宋湯，熱飲/凍飲/汽水/特飲。羅宋湯羅宋湯大大碗，經典港式口味，味道偏辣，湯料食到牛肉，番茄，西芹，紅蘿蔔，熱辣辣上枱。不過我覺得太辣。美式雜扒鐵板美式雜扒鐵板上枱，熱辣辣，長期辣嘴。牛扒一塊薄薄地，肉質算唔錯，外皮有少少脆，唔錯唔錯。塊豬扒連骨，都係薄薄地，不過肉質好嫩，食落少少彈牙。雞扒就最細塊，連皮，不過係雞腿肉，整得皮脆肉嫩。呢度塊鐵板夠勁，所以肉類整得脆皮，我呢d鍾意香口人士就最鍾意。另有香腸一細條同煙肉兩細片，又可以整到脆皮，不過煙肉真係好鹹。個燒汁都唔太需要，肉類本身已經夠味。揀左配薯角，一共10件連皮，呢個就無脆皮，入面就啖啖澱粉質，味道係原味，另有一包包裝茄汁比你點。最後有一細舊西蘭花同一片花型紅蘿蔔。呢個鐵板食肉獸就超對口味，鐵板質素好好。紅豆冰紅豆冰叫左少冰，有4粒冰，無飲管，飲管要加兩蚊。有好多原粒紅豆係底，椰奶味道都唔過甜，配甜紅豆就剛好。總括而言，食物質素絕非一般茶記，當然裝修同環境都乾淨衛生好多，絕對反映係價錢度。