洛奇冰室 (已結業)

#我可能要食晒所有茶記嘅常餐每間茶記嘅常餐都有佢自己嘅特色，雖說離不開都係麵同火腿蛋牛油多士嘅配搭，但細看之下，其實當中有多重選擇，甚至偶有驚喜，就係點解我鍾意食常餐嘅原因。首先喺麵方面，個人來說，我鍾意叫沙嗲牛肉、五香肉丁或榨菜肉絲，但我曾經食過有呢間嘅雪菜肉絲幾夠咸味，所以偶爾會寵幸佢。而且有時知道邊間嘅沙嗲牛肉比較淡味或較稀，我就會轉會食其他。不過，每次叫沙嗲牛肉或者五香肉丁，總係唔食入面嘅肉，只係享用肉汁帶來嘅滋味，好古怪吧？除咗麵嘅配料，對於麵條本身嘅軟硬度，我都比較腌尖，每次落單都會講聲：「麵要生啲呀，唔該！」係，我係唔鍾意食軟林林嘅麵，呢啲真係好講個人口味。至於喺多士方面，無論係火腿蛋或者腸仔蛋，我都會食，只係通常會選擇全熟蛋，因為有時如果塊多士唔夠脆口，點蛋汁會令口感好噁心。所以麵包係重要一環，就好似我今次食呢個，只係用上白麵包，然後輕輕烘一烘，連包皮邊都送埋畀我，我就真係覺得一般。曾食過一啲茶記，佢哋嘅多士係用上厚多士配蒜蓉牛油，仲大大力一烘，微微見到燶邊，味道一絕。當然，大部份茶記都係用上普通白麵包，有時連烘都冇或者要加錢烘，我仍然會欣然接受，如果其他嘢都合格的話。