沙嗲王 (已結業)

好多年無嚟過沙嗲王，今次係因為其中一位朋友仔有沙嗲王現金券而決定呢次聚餐地點，諗返對上嗰次嚟仲係海盜主題。坐低後睇餐牌，選擇比以前少，特別係小食，我哋四人每人揀咗一個午餐另加兩個小食。芝士焗牛柳飯粒，牛柳幾好，唔韌，但汁嘅味道唔特出。慢煮豬軟骨飯配溏心蛋半隻，豬軟骨夠淋又入味。白咖喱香茅豬扒烏冬，豬扒都幾好，唔係醃到好鬆無晒肉味嗰種，白咖哩湯溫和微辣。鐵板嬌嫩巨脾飯，雞脾係燒得唔錯，好嫩滑，但係淋汁上去係無吱吱聲，鐵板係裝飾。印度薄餅，無配咖哩汁。一口炸雞球，雞肉可以，外層唔會太厚。芝士焗年糕，芝士可以拉絲。涷紫薯鮮奶配珍珠，好味略甜。抺茶鮮奶配西米，抺茶味唔太濃，都係甜咗少少。