沙嗲王 (已結業)

前晚喺呢區搵野食, 師傅又想搵間可以坐耐少少, 但又唔會太貴嘅食店, 最後醒起呢度, 加上好耐都冇黎食過, 就入去試一餐啦!入到去唔多人, 好快有位坐; 一坐師傅即刻睇下有咩食, 最後師傅揀左個娘惹咖哩牛肉飯, 而友人就柯打左碗清湯香茅豬扒湯河, 再加左個芝士焗青口, 而飲品就柯打左薄荷七喜同埋椰果青蘋果梳打!先講下娘惹咖哩牛肉飯, 咖哩非常之香, 但唔算太辣, 而牛肉就好鬆身, 味道唔錯, 得喎; 芝士焗青口一客三隻, 芝士都幾多加上焗得幾香, 青口就幾細隻, 不過味道算唔錯, 可以啦; 而清湯香茅豬扒湯河嘅香茅豬扒就幾油, 豬扒韌少少, 而河粉師傅就冇試到喇, 不過師傅估都係一般啦! 而飲品薄荷七喜就真係好夠薄荷味, 好正呀; 而椰果青蘋果梳打都冇試過, 不過味道應該唔錯!總括黎講食物質素都尚可, 環境一般, 服務又係普普通通, 價錢就唔算貴, 加埋一埋單一百五三蚊, 可以啦; 師傅次次黎親呢間食店, 都冇試到呢度d沙爹, 到底呢間食店嘅沙爹係咪真係咁掂呢? 係咪真係可以稱王呢? 偶然黎呢度食餐飯都幾舒服, 下次有機會一定會試下呢度嘅沙爹, 笑臉可以一比!