聯發茶餐廳

營業中

休息中

其實九龍城真係有好多好野食，大部分都係小店，係一個少有的區域未被連鎖餐廳攻陷。星期六晏左起身過哂午餐時間，就決定黎茶餐廳，食物都係全日供應，過左午餐時間都冇所謂。茶記就梗係唔少得常餐啦！太肚餓掛住食都冇影多士炒蛋。但牛油多士好厚好正，烘得好脆，牛油啱啱好。炒蛋唔會油，但略嫌散左啲，但夠哂滑！沙爹鮮牛肉出前一丁，簡直係茶記必選，呢度亦冇令我失望，份量又夠，最緊要係沙爹味濃，微辣，夠哂味，出前一丁亦煮得啱啱好。好多一般的茶記真係連出前一丁都煮得差架。本想試呢度的滑蛋蔥花叉燒飯，可惜是日冇供應。改左叫炭火叉燒飯，可以揀大或小，大的會有煎蛋一隻，我食的係小。真係比較細碗，但甜豉油自己落，鐘意幾多落幾多。叉燒好厚切，但略嫌太瘦，如果多啲半肥瘦會好食啲。唔太食到炭火燒的香味，同一般叉燒冇乜分別。整體一般。茶記就係食個份本土味道，服務從來都係唔好，但亦係特色之一，坐又例牌要搭抬，但就係最香港的餐廳，久唔久就係會想食。