龍門一番川滬·紫砂燉湯 (已結業)

餐廳位置尚算就腳方便，店面寬落，主要係卡位為主，私隱度高。平日晚飯時間，店員好快安排到座位。菜單選擇都多，前菜，肉類，小炒，湯品，酸菜魚鍋，特色飲品，包括雞尾酒應有盡有，而且價錢相宜賣相亦唔錯添。我地選擇了四式拼盤，花多眼亂，最後有醉翁蝦，千層水晶肉，麻辣魚皮及蒜泥白肉。小菜擺放精緻，醉翁蝦酒味不會太濃，我唔飲酒都會愛上呢個菜。另外，水晶千層肉口感豐富清爽有層次，不錯。麻辣魚皮亦爽口辣度十足，好夠開胃。另外飲品值得一讚，賣相絕對不輸蝕，份量十足。一杯芒果雞尾酒，芒果果肉十分足料。另外夏日傾情summer love,草莓夠重，酸酸甜甜好消滯。最後要介紹嘅係酸菜豬肚雞，材料十足。炸過嘅雞件都仲保持到肉汁，豬肚無騷味，口感爽口彈牙，配埋白飯就完全無浪費湯汁。整體來說，從菜式，賣相同份量都很不錯，值得回頭再試。