二鍋頭 (好運中心)

營業中

休息中

今日放學同朋友一齊食飯，咁多人梗係食雞煲！我地嚟咗沙田嘅二鍋頭食雞煲火鍋放題。除咗雞煲，仲可以任食鴨煲同豬手煲，咁邊爐我哋就揀咗中間嗰個嚴選安格斯牛餐，$268可以任食雞煲、鴨煲、豬手煲、Binlo兩個鐘，非常抵食！二鍋頭惹味雞煲我哋叫咗個少辣嘅雞煲，廚師會先喺廚房先炒一炒先上枱，上枱後，店員會再炒炒，確保雞煲冇黐底同熱辣辣。雞煲有好多雞件、大蔥、洋蔥同鳳爪。雞煲醬有好多蒜蓉，好香口，少辣有麻麻地嘅味道，好過癮。雞件大舊多肉，肉質算滑。大蔥同洋蔥吸滿醬汁嘅味道，好惹味！嚴選安格斯牛餐 $268火鍋方面，我哋叫咗蕃茄薯仔湯。依個set我最鍾意叫安格斯封門柳。封門柳切得大片，仲有牛味濃郁，口感軟淋。另外，我哋仲叫咗蜆，蜆肉新鮮鮮甜。除咗有QR code點單，出邊仲有好多嘢食可以夾！其中我最鍾意蘿蔔、粟米、花枝丸同響鈴。蘿蔔、粟米味道鮮甜，仲吸收咗湯底嘅美味。花枝丸大大粒，煮完仲更加脹卜卜，食到花枝嘅粒粒，好味！除此之外，出面仲有多款飲品同甜品選擇。今餐真係好豐富，又抵食，推薦大家過嚟試試呀！