新蒲坊 (已結業)

沙田市中心呢邊都冇乜小食店，新蒲坊算係其中一間，亦喺沙田經營左好多年。細細嘅舖位孕育咗好多人嘅集體回憶。以前串燒只需要6蚊，慢慢、慢慢變到而家10蚊一串，所以都唔係成日黎食。今日喺沙田拍下拖嘅時候就去買幾串串燒黎咬下。等候嘅人相當多，但舖頭好細，而且冇明顯嘅隊比人去排，所以呢如果客人諗好叫咩就要比啲勇氣上前同啲姐姐講食乜，因為有好多人都係等緊野食或者諗緊食乜。多數人黎呢度都係食串燒，不過呢度其實都有車仔麵，但我就從來都冇食過。呢度有幾種串燒，雞肉、豬頸肉、牛肉、司華力腸、煙肉等等，你諗得出嘅都有架喇。諗定就快啲嗌喇，因為都好多人叫等一段時間架！呢度係即叫即燒嘅，好佩服啲姐姐係嗰熱熱嘅火爐前燒咁耐。今次叫左豬頸肉同雞肉，等左大約5分鐘左右，點埋呢度特制嘅蜜糖醬同沙嗲醬就食得喇！串燒用發泡膠盤仔裝住，如果淨係叫一串嘅話係唔會提供盤仔嘅。客人都係企喺度食嘅，行出啲就係沙田公園，有啲人都會拎落去坐喺度慢慢食嘅。嗰兩隻醬又係百搭嘅，點咩都咁好食。豬頸肉一如以往咁爽口，有咬口之餘又唔會太un，而且肉汁好juicy，而雞肉就好嫩滑，而且多肉，味道就好似BBQ咁樣，好香，好想食多幾舊。