幸拉麵 (已結業)

喺網上見到啲食評,因為好奇所以去試下。裝修企理,環境舒適,燈光都光猛嘅,最重要就係食完一個拉麵之後,全身都冇一陣味囉!我最驚就係去嗰啲食肆,食完之後全身有浸油味/臭味。店舖播放著一啲熟識嘅日文歌,唔會覺得好嘈。店長好認真咁樣去處理啲食材。呢個壺嘅設計可令我地飲到暖水,又唔會過熱呢! 通常拉麵店都係俾冰水,呢度抵讚!麵嘅款式唔多,只有三種選擇,但係貴精不貴多。我哋揀咗一款白豚,一款赤豚。赤豚主要特色係用蕃茄,食到好多新鮮蕃茄,唔覺用茄膏。仲有辣椒同埋肉碎造成赤嘅感覺,但係又唔會好辣,聞到好香。紫菜好脆口,啲荀係醃製過嘅,有一種好特別嘅味道,同平時食嗰啲係唔同嘅。溏心蛋可以煮到流心狀咁嘅, 隻蛋好滑,溏心好甜,唔會過熟。可以見到呢塊豚肉呈粉紅色㗎!初初以為係咪未煮熟呀? 試左之後覺得佢好滑好軟熟,估計係慢煮出嚟嘅效果。跟住試第二塊,浸一陣湯之後再食會有另外一番感覺喇!第二塊擺咗一陣先食都唔會好似喺外面食嗰啲叉燒好似條柴個種。麵就定咗㗎啦!係硬身嘅麵嚟,冇得選擇個軟硬度嘅。個湯聞到有浸豬羶嘅味道,但入口又好香,食唔到有羶味! 我地好奇去問店長,原來D油都係用即炸豬油,所以有個種香味。同埋佢個