BriKetenia (已結業)

今日又再嚟到觀塘尋找美食，係一個位置低調又隱蔽嘅地方試試法國米芝蓮餐廳-BriKetenia。餐廳內裡裝修簡約寬敞，沒有任何華麗感覺反而走平實路線，入面仲有個半開放嘅廚房，客人可以透過玻璃睇到廚房內嘅情況。我同朋友分別都叫咗Set Dinner，我就選擇咗頭盤-忌廉南瓜濃湯伴香煎帶子配黑松露忌廉；主菜-烤澳洲牛柳配黑松露薯蓉及小甘筍。首先嚟嘅係麵包-法國餐必有嘅餐前小食，呢到嘅麵包鬆軟，另外配自家製嘅醬非常好味，食到停唔到口。然後到忌廉南瓜濃湯，先上一個只有帶子、忌廉泡沫、麵包粒及南瓜粒嘅碗，之後侍應會幫忙倒入濃湯，再拌勻享用，拌勻過程會聞到黑松露嘅香氣；帶子味道鮮味，煎得剛剛好，口感嫩滑；南瓜湯非常新鮮而且打得非常幼滑配埋濃郁嘅黑松露忌廉，味道好正！之後到牛柳，我選擇咗5成熟，肉質不錯，而且比想像中軟腍，油脂亦少，另外薯蓉滲出淡淡嘅黑松露味道口感細膩。最後到甜品檸檬果凍伴青檸雪葩，底下有菠蘿粒，整個感覺酸酸甜甜，可以清清味蕾，好有夏天感覺。-雖然係同區嚟講價錢稍貴，但以法國餐及米芝蓮質素亦可接受，服務員亦親切有禮，食物質素亦不錯。