Le Relais de l'Entrecôte (已結業)

話說多年前，朋友同隊長去左灣仔一間法國餐廳慶祝生日，佢地訂左個2層心太軟當做蛋糕，堅好味，到而家仲記得！今年生日，想重遊舊地⋯⋯不過已經轉左另一間法式扒房，好似話係法國係殿堂級既舊式扒房。入到去就真係好舊式扒房style，而有選擇障礙既朋友，你唔駛驚，因為佢全日既menu都係得一款⋯⋯就係牛扒餐，你只需要揀幾多成熟就可以勒。先黎兜麵包同沙律，個沙律都幾大碟的，然後就黎主菜牛扒，我叫左medium⋯⋯但似乎well done左，尤其上到第二塊時，更覺well done。上牛扒時，法式阿姐會先砌半件比你，另外半件會用蠟燭興住，到你食完第一件再幫你上碟，而且薯條係無限供應⋯⋯比你食都食唔到幾多，至於個汁係青bb的，其實係秘製汁⋯⋯但我食唔出有幾秘製，同埋有個疑問：點解牛扒會有陣羊羶味既！？除左牛扒，餐廳都有多款甜品揀，我地揀左一款signature sorbet蛋白餅、creme brûlée & Mont Blanc，但我最愛creme brûlée，真係好滑好香好好味，果然係法式餐廳既地道法式甜品 ！