金蘭花泰國菜 (已結業)

灣仔其實係一個好多美食聚集嘅地方，有好多隱世嘅小店唔係開係大街大巷，而係響大廈裡面。今次呢間餐廳就係一間隱世嘅泰國私房菜。呢間餐廳位於一座商業大廈嘅2樓，佢嘅裝修簡約，乾淨。雖然唔係好豪華，但好有家嘅感覺。打開餐牌有好多選擇，樣樣都好似好吸引咁。我哋就揀咗幾樣最鍾意食嘅嘢，例如恐龍蛋（蝦餅皮蛋），一個好開胃嘅柚子沙律，一個海鮮炒飯同埋從未見過嘅臭蛋炒蛋，再加多一杯泰式奶茶。柚子沙律酸酸甜甜帶少少辣，非常開胃惹味。柚子沙律入面嘅竟然唔係花生，而係更好味嘅腰果，提升個沙津口感同味道。海鮮炒飯味道其實好好，只不過實在太辣啦，唔係人人都接受唔到，食到我噴晒火。蝦餅皮旦嘅蝦餅好彈牙好爽口，皮旦又係流心，食材好靚，真係非常好食。呢個臭草炒蛋望落去個樣好似好普通又好似好唔抵咁，但估唔到食落去原來係咁香，啲蛋煎得個邊燶燶地，好香口，臭草除左煲綠豆沙之外，原來炒蛋都係咁夾。最後加埋一杯泰式奶茶，真係飽到上心口。呢間私房菜嘅食物水準都好高，而且價錢又唔係貴，有好多餸都未試，一定會再返嚟食。