Mana Thai Kitchen (已結業)

居港嘅泰國人大部份都集中喺九龍城，但其實灣仔都有一間泰菜值得推介。呢間位於灣仔嘅Mana Thai Kitchen，由泰國人主理嘅餐廳，味道夠晒地道正宗，最重要係Mana Thai Kitchen嘅環境夠晒舒服，啱晒大家放工嚟到，嘆吓泰菜順便輕鬆一吓。柚子鮮蝦沙律 $108 講到泰國style嘅沙律，就一定係柚子鮮蝦沙律啦！鮮蝦有3大隻，仲已經預先剝殼，食得夠晒方便。柚子份量超多，仲有脆脆、辣椒同蔥花，撈埋嚟食又酸又甜又辣，好有層次！泰式烤豬頸肉豬頸肉燒到燶邊，非常香脆，加上焦香味，真係好吸引呀！豬頸肉都算厚切，肥瘦比例適中，重點絕對係餐廳自製嘅酸辣汁，夠晒惹味！泰式炒通菜份量非常多，通菜新鮮爽口。豬肉船麵勁多配料呀！除咗豬肉片，仲有豬肉丸、蘿蔔同炸豬皮等。豬肉片同豬肉丸嘅肉味非常香濃，但最得我哋歡心嘅係入晒味嘅蘿蔔！另一樣入晒味嘅當然就係金邊粉啦！金邊粉滑溜煙韌，勁吸湯。泰式奶茶、龍眼冰最尾叫咗2杯泰式飲品，夠晒解渴，唔會死甜。