鼎豐雞煲泰國菜 (已結業)

我哋今次試麻辣雞煲半隻中辣，店員問我哋頂唔頂得順，驚我哋食唔到咁辣，好細心。但係我哋對於食辣呢方面都比較有信心，所以堅持中辣～嚟到嘅時候已經好香，店員幫手撈勻就食得。我明白點解店員會擔心我哋食唔到，其實又真係幾辣嘅，好彩平時訓練有素！自問唔係好食得辣嘅可以試吓BB辣同小辣。啲雞好滑，店員叫我哋開始食嘅時候，依家係啱啱好熟嘅狀態，所以店員會幫我哋熄火，話驚啲雞會標油令到啲肉老咗就唔好食，真係超級細心！我哋叫左少少配菜：萵筍、鴨血、雞子、娃娃菜，另外仲嗌左一個佢哋舖頭自家製嘅麻辣餃。要特別讚嘅係佢哋嘅麻辣餃，有成隻蝦係入面，麻辣嘅香味滲透成隻餃，真心好食！呢間舖頭除咗雞煲仲有主打泰國菜，於是我哋都試吓佢嘅牛油雞翼，擺到上枱已經成陣蒜蓉牛油香飄晒出嚟～啲雞翼熱辣辣咁，雞翼非常之嫩滑，呢味餸比較濃味，好想嗌個飯送飯食！因為佢係雞嗰加泰國菜，佢有新鮮椰青冬蔭功湯底嘅雞煲，好新穎～下次一定要試吓！