Chilli Lime (形點 I)

營業中

休息中

一個人無無聊聊咁行下YOHO，發現原來有一區域有好幾間食肆，有日式餐廳、日式火鍋、西式餐廳、台式餐廳、多國菜餐廳（以泰國菜為主），最後揀左食泰菜。我不太喜歡食肥膩嘢，所以揀左三款清淡嘅菜 (頭盤、主菜、甜品)。我嘅頭盤係泰式柚子鮮蝦沙律 ........ um 好味道，柚子有少少苦澀味，但酸酸甜甜嘅汁平衡返啲苦澀味，拌入鮮蝦、花生、炸椰子絲、炸蒜絲、葱粒、紅葱頭，食起來好醒胃，味道好多層次，做頭盤一流。我嘅主菜係越式軟殼蟹米紙卷 ........ 透光輕薄嘅米紙卷包著咸香酥脆嘅軟殼蟹，配上牛油果、蟹子、沙律菜、甘筍條、青瓜條，唔洗點醬食都覺得好美味，因為啲材料好新鮮，所以食到食物本身嘅鮮甜既健康。我嘅甜品係椰絲班蘭丸子布甸 ........ 第一次食班蘭布甸，造型好特別，係一個暖食嘅甜品，不太甜，好啱我口味，一粒粒綠色嘅班蘭西米粒搓成一個大波波，口感煙煙靭靭，再以新鮮椰絲條包住，一口咬下滿滿嘅椰香，上面鋪滿一絲一絲嘅甘筍絲，非常吸晴。