檸檬葉屋 (已結業)

之，前嚟呢個商場食嘢見到隔離有間泰式外賣店，有小食，主食，甜品等，價錢都合理。咁啱今日有同事因為唔想OT而要留公司食晏，身為好同事嘅我當然要幫手做外送速遞員啦，既然我買當然我話事食咩啦。買咗四個主食，一個小食，一個甜品，味道有啲唔錯，有啲一般，店員係泰國人，好有禮貌，包裝亦好好，感覺乾淨。門口有各式小食，淨食。甜品，即食麵，零食。泰式炭燒豬頸肉，燒得幾乾身，無咗豬頸肉嘅油脂口感，睇個人喜好，我偏向有少少油膶感多啲，不過都唔錯嘅。海南雞飯，雞比較鞋，飯多啲油會好啲，湯無咩味精味道。泰式豬手飯，唔夠淋，瘦位有少少鞋。黃咖哩牛腩飯，牛腩唔太淋，有較口，份量滿意，我欣賞個汁嘅椰香味，覺得最好味呢個。泰式海蝦炒金邊粉，配料少，只有三隻細蝦仁，味道一般。千層蒸糕，層次分明，用筷子夾都有軟糯嘅感覺覺，食落唔太甜，幾好味。