藍象泰國餐廳 (已結業)

同朋友黎到海港城唔知有乜好食，朋友就推介左呢一間喺泰國好出名嘅藍象餐廳，即刻好想試吓。環境好闊落，有好多間㗎，好適合同朋友嚟食飯，仲可以舒服咁傾吓計，都唔會覺得唔自在。見好多台都有叫到小食拼盤（$168），我哋都唔執輸，帶咗一份，咁嗌其實比散嗌平左差唔多$100 ，所以係抵啲㗎，一次過可以食哂咁多款小食。炸蝦餅好彈牙，正！燒花生菠蘿串，好特別，不過我個人就鍾意分開兩樣野食。之後帶咗一個馬莎文咖喱牛腩配甜番薯（$238），呢個出乎意料地好味，唔好睇佢好似好細究咁，其實入面配料十足，食咗勁多牛腩都仲有。值得一提嘅係，甜番薯原來同咖喱好夾㗎，啲番薯俾我搶晒嚟食。值得一試。平時食泰國咖喱，都會叫蒜蓉包點啲咖喱嚟食，今次我哋都嗌咗蒜蓉包（$38），蒜蓉包比較脆同埋硬，蒜蓉味唔係好龍，點左咖喱食都唔覺得特別好味，感覺似法式面包。唔建議大家食呢個，留肚食其他野仲好有冬陰公味嘅泰式豬頸肉炒飯，呢個望落去份量好似有啲細，但係絕對夠飽，酸酸地辣辣地嘅味道原來都好適合用嚟炒飯個喎。豬頸肉肉質彈牙，仲要係啖啖都有。呢個ok!最後埋單$651，喺尖沙咀海旁食黎講，藍象算係一個超值嘅選擇啦。