MAZ Thai & BBQ (已結業)

朋友話今晚帶我食泰菜，但一到埗就發現門面同內裡裝潢設計都同平時嘅泰菜館好唔同，完全無諗過泰菜都可以咁有格調，而且食物選擇多元化，屬於泰式Fusion，叫左幾樣食物都頗有質素，令我特別深刻嘅有以下呢幾款：1 . 泰式生蠔唔講完全唔知呢D賣相咁靚、一杯杯嘅竟然係生蠔！泰式生蠔味道係酸酸地，係相當開胃嘅下酒料理，原來個生蠔醬入面有檸檬、魚露同薄荷等等調校成，咁樣夾落生蠔度有幾有新鮮感喎！平時我比較鍾意食焗蠔，因為怕生蠔果陣少少腥味，但呢個泰式整法就真係令我完全改觀。生蠔本身亦甚有質素，滑入口中，生蠔醬配上生蠔帶少少海水味同鮮甜味，喺口入面慢慢細味，味覺實在享受。2. 鹽燒馬友以前食過阿媽整嘅酒糟蒸馬友，對呢款魚相當有好感，而泰式整法又好有當地特色，用鹽燒方式令魚外皮更香、肉質更嫩，又能鎖住肉汁，馬友魚本身味道鮮美，骨又偏少，魚肉細潤，點埋旁邊嘅酸辣汁，更有提鮮作用。3. 芒果糯米飯又係個精緻賣相已經令人好有好感，完全係高級西餐嘅presentation，細細杯細細啖咁品嘗，糯米帶點軟黏嘅口感幾有咬勁，芒果夠香甜，食多幾杯都唔過份。