泰海鮮 (已結業)

之前同朋友都有去開三聖食海鮮，今次見到呢間主打泰式海鮮嘅餐廳，基於好奇心嘅驅使下，一於同朋友們試吓新嘢先。海鮮湯用咗瀨尿蝦、蜆、薯仔同蕃茄煲，味道飲落鮮美，啲薯仔吸晒海鮮嘅精華，真係好好食! 泰皇芝心蝦丸外層加咗啲麵包粒，食落更脆口，蝦膠爽滑彈牙，裡面包住啲溶咗嘅芝士，極邪惡之選! 青山灣焗龍蝦嘅龍蝦肉質彈牙，鋪滿晒芝士，食落好香口。上湯焗龍蝦同樣好彈牙，比起芝士焗嘅做法，就比較食得出龍蝦嘅鮮味。白酒忌廉煮花甲烏冬底啲花甲又大隻又肥美，時間煮得剛剛好，花甲鮮味之餘，又有濃濃嘅白汁奶香味，配上烏冬呢個組合都幾特別。香茅瀨尿蝦嘅香茅味幾出，令瀨尿蝦食落多一份香氣，瀨尿蝦肉質鮮甜彈牙，仲有炸過嘅腰果好香口，送酒一流呀! 咖哩炒蟹嘅蟹肉係實肉爽甜嗰種，咖哩微辣，調到蟹肉嘅鮮味出嚟，呢個送飯好正! 豉椒蟶子皇米粉底嘅蟶子食落爽脆，用豉椒炒就最惹味，墊底嘅米粉係煎香過，所以可以盡吸鮮味嘅獻汁。薑葱鮑魚煲啲鮑魚煮得啱啱好，食落彈牙，一啲都唔會韌，勁香薑蔥味。呢餐海鮮質素好高，仲要啲食物嘅烹調手法同組合好有特色，真係值得再 encore!