紫蝶花 (已結業)

近排將軍澳中心開咗好多新嘅餐廳，竟然有我最愛嘅泰國菜！沿途去緊餐廳嗰陣都有上OpenRice睇吓d comments，感覺上好似麻麻地。見佢有咁多人食，我同朋友最後都膽粗粗決定去試吓！叫咗個二人套餐，小食揀咗泰式豬頸肉。呢個食落外皮脆脆地，中間就好鬆軟，口感一流，份量亦好多！另外主菜就叫咗咖喱牛肋條同埋泰式炒牛河！咖喱牛肋條味道唔係好辣，都有七至八塊牛肋條，配菜嘅薯仔都煮得好腍！泰式炒可好有鑊氣，唔會太咸，牛肉好嫩！馬拉盞炒通菜味道啱啱好，菜亦都好新鮮！飲品就揀咗珍多冰同埋藍蝶花椰汁特飲。珍多冰甜度唔高。藍蝶花椰汁特飲椰汁味好濃，飲落去會有少少酸酸地，好特別！另外仲要點左個椒鹽軟殼蟹同埋椰汁千層糕。軟殼蟹有成三大嚿，味道都唔錯。千層糕就即叫即蒸，如果有得凍食更加好！