薄荷葉泰國菜

營業中

休息中

餐廳充滿泰式風情，環境好有身處泰國渡假嘅感覺。店內掛滿民族色彩嘅燈飾及泰象布料，無論燈飾抑或擺設都各具特色！餐廳不時播放住泰國嘅流行音樂，氣氛相當唔錯。餐廳以自家農地去種植有機蔬果及香料，保證食材新鮮有質素仲符合環保嘅原則！而食物則由泰籍廚師主理，確保風味正宗。餐牌上有好多唔同嘅菜式選擇，有小食、頭盤、沙律、海鮮、湯、蔬菜、套餐同飲品等等...今次叫咗四樣食物，落完單之後店員會根據你叫嘅菜式送上唔同款式嘅醬料，然後再係上菜時提點你要用邊一款醬料，認真細心。炸蝦球外皮炸到金黃酥脆，蝦膠爽口彈牙又有鮮味，點上甜酸辣醬一齊食，味道唔錯。馬拉盞炒通菜馬拉盞配上辣椒絲同蒜蓉嚟炒，夠哂鑊氣，通菜爽嫩，風味十足。特色菠蘿飯以木桶上，份量好多，炒飯上面鋪滿肉鬆，炒飯入面有蝦、魷魚鬚、魷魚圈、腰果、提子乾、粟米及青豆等等...口感豐富。招牌火焰燒雞雞醃得入味之餘賣相又好特別，外層燒得夠香口。上菜時店員會喺雞身上淋上酒然後點火，感覺好有特色，名副其實 "火焰燒雞"。最後叫咗杯可樂同一個椰青，椰青飲落去好清甜，椰肉亦都好食。