泰 (已結業)

今日同朋友喺黃大仙附近搵嘢食，見到有間泰國菜外面裝修幾有特色，於是入去試吓。入邊裝修都幾有特色，有一個酒櫃，同一個project喺度播演唱會。我哋坐低左叫咗個set A二至三人餐，入邊有肉碎生菜包豬肉，燒豬頸肉，泰式炒飛天通菜，蝦醬炒飯，明火例湯。過咗一陣，明火例湯首先送上，佢用一大個碗裝住啲湯送上，入邊材料主要有白菜同南北杏。跟住泰式炒飛天通菜亦都送上，通菜上邊有少少辣椒，啲通菜食落有少少辣，味道唔錯。跟住係肉碎生菜包豬肉，肉碎同生菜放喺同一個碗度送上，一碗大概有6片生菜。啲肉幾入味，啲生菜都幾新鮮，味道幾正宗。之後燒豬頸肉亦都送上，上面有朵花做伴碟，豬頸肉份量唔少，豬頸肉燒得啱啱好，咬落去有啲肉汁係入邊。最後係蝦醬炒飯，炒飯上邊有隻炒蛋同埋豬肉鬆，加上隔離有腰果，可以撈埋啲飯一齊食，啲飯蝦醬味都幾重，加埋腰果同蛋個組合味道唔錯。