影片
更多
2019-04-19
97 瀏覽
鰻魚迷今次黎到呢間SEN88，無非都係想試下佢個活海鰻會席（$488）。係日本川越食條名物燒鰻魚，都要幾乎三舊水港紙，SEN88呢個活海鰻會席，據聞係買啲鰻魚返黎養一排先膛黎食，好似真係零舍不同！不過最緊要既係，呢個會席當中包括沙律、刺身、海鰻年糕、海鰻天婦羅、海鰻籠仔蒸飯、海鰻玉子蛋糕，咁多嘢都係488，CP值未食都覺得高！季節沙律，比較少見會放上炸魚皮，感覺新穎，醬料幾開胃，啲菜都係新鮮既，頗有誠意。開胃菜之後就係比較清淡少少既刺身3合，日本人流行從清淡既食物開始食，所以先上啲清淡既刺身俾大家熱下身。甜蝦刺身好大隻，好鮮甜，一入口就俾啲蝦膠漿住咗個口，吞嚥之後仲會回甘。最鍾意佢連蝦頭上，可以啜埋入面啲蝦膏，萬萬不能錯過！赤貝刺身由於味道比較清淡，師傅用咗青檸同柑粉用果酸黎帶出佢既鮮味，所以入口嗰陣會有陣清香果位，頃刻之後就係赤貝鮮味爆發既時刻，都真係估唔到咁淡既貝類，竟然可以俾佢調到鮮味至少放大咗幾倍，真係厭食都俾佢勾到暴飲暴食。最後一款刺身係深海池魚，師傅好有耐心咁介紹食材既種類同分別俾我地聽，原來池魚同深海池魚係兩種魚黎，深海池魚脂肪超多，入口即融，高級食材既好處就係鮮味同腥味
鰻魚迷今次黎到呢間SEN88，無非都係想試下佢個活海鰻會席（$488）。係日本川越食條名物燒鰻魚，都要幾乎三舊水港紙，SEN88呢個活海鰻會席，據聞係買啲鰻魚返黎養一排先膛黎食，好似真係零舍不同！不過最緊要既係，呢個會席當中包括沙律、刺身、海鰻年糕、海鰻天婦羅、海鰻籠仔蒸飯、海鰻玉子蛋糕，咁多嘢都係488，CP值未食都覺得高！
季節沙律，比較少見會放上炸魚皮，感覺新穎，醬料幾開胃，啲菜都係新鮮既，頗有誠意。
開胃菜之後就係比較清淡少少既刺身3合，日本人流行從清淡既食物開始食，所以先上啲清淡既刺身俾大家熱下身。甜蝦刺身好大隻，好鮮甜，一入口就俾啲蝦膠漿住咗個口，吞嚥之後仲會回甘。最鍾意佢連蝦頭上，可以啜埋入面啲蝦膏，萬萬不能錯過！赤貝刺身由於味道比較清淡，師傅用咗青檸同柑粉用果酸黎帶出佢既鮮味，所以入口嗰陣會有陣清香果位，頃刻之後就係赤貝鮮味爆發既時刻，都真係估唔到咁淡既貝類，竟然可以俾佢調到鮮味至少放大咗幾倍，真係厭食都俾佢勾到暴飲暴食。最後一款刺身係深海池魚，師傅好有耐心咁介紹食材既種類同分別俾我地聽，原來池魚同深海池魚係兩種魚黎，深海池魚脂肪超多，入口即融，高級食材既好處就係鮮味同腥味分得好開。呢塊深海池魚刺身完全冇魚腥味，反而有一種淡淡既油脂香，一入口就化曬，令我差啲唔記得今日主角係鰻魚！
首先打頭陣既活海鰻蒸年糕，賣相有啲似日本既年糕福袋，但油炸過既表層入面除咗年糕仲有啖啖海鰻肉。年糕原本冇乜味，但海鰻有佢獨特既鮮味，年糕屬於一種比較吸味既食材，所以互補之下，吸收曬鰻魚既精華，令成個年糕都含有豐富既海鮮味。感覺的確幾新穎。
之後上場既選手係活海鰻天婦羅。我夠膽話，大家係出面一定冇食過咁厚身既鰻魚。唔係講笑呢舊鰻魚天婦羅幾乎有一個五蚊銀咁厚身，一咬落去成口都係鰻魚既脂肪，肥美到幾乎要搵支美極黎助興。值得一提既係呢個鰻魚天婦羅肉質係彈牙，而唔係出面肉質鬆散既次貨，完全係食得出呢條鰻魚生前係幾咁有活力鍾意做運動。
終於到主食上場了，活海鰻籠仔蒸飯。賣相搞笑，完全係酒樓既點心籠，不過入面就係鰻魚汁蒸飯同大大舊鰻魚肉。細食之人不必擔心，呢個套餐並唔係以米飯黎填飽你既肚，而係用鰻魚豐富你既心靈！當你以為頭先既鰻魚天婦羅已經係人間極品，咁呢隻蒸飯上面既鰻魚就係天國極品。
只係兩舊鰻魚，就已經幾乎蓋曬整個點心籠，你心入面可能會懷疑廚房入面係咪斬咗條百年鰻魚精。彈牙、多脂肪呢啲係基本，精華係鰻魚之下既米飯。每一粒都係充滿鰻魚汁同埋脂肪蒸完留抵既精華。食完一啖又一啖，係完全停唔到口，絕對唔可以睇少看似平平無奇既鰻魚飯。
最後甜品係鰻魚玉子蛋糕，呢個菜式真係聞所未聞。用鰻魚精華所製造既玉子蛋糕，係有三層既味覺享受。第一層係蛋糕既鬆軟，入口綿密；第二層係蛋糕底下既一層玉子，入口彈牙軟韌，最後一層就係咀嚼之間散發出黎既鰻魚香。呢個係一道極具創意既甜品，看似鰻魚與蛋糕風馬牛不相及，但師傅巧妙地揉合兩者，的確有心思。
呢個活海鰻會席食之前覺得cp值高，食完之後覺得cp值簡直係爆表，仲可以睇住師傅表演刀工，順便普及埋食材知識，真係唔知一舉幾多得了。總括而言，係值得一試再試。
張貼
