金田家 (已結業)

咁岩喺將軍澳附近，所以就想問下附近有咩食，之後就搵到呢間金田家分店！之前都試過食紅磡所以今次就試下食將軍澳呢間啦。一入到去環境都算寛敞，燈光明亮感覺都幾舒服。黎得拉面店緊係食拉麵啦，呢度一共有八個拉麵可以揀，我同朋友分別揀左黑豚拉麵同辛子黑蒜拉麵，依家都好貼心有得揀麵嘅軟硬度，有得揀要唔要蔥同蒜。另外我地仲加左流心蛋，粟米同埋豚肉，仲加咗份海老餃子。首先就講左黑豚拉麵先，啲黑豚係圍住個麵，好滿足，豚肉好香口，薄薄地，好易入口，啖啖肉，值得一讚嘅係湯底，好香好濃，完全停唔到口！要講下成個面最鍾意嘅野。就係佢嘅流心蛋，金田家嘅流心蛋係我最鍾意食嘅，好入味。朋友既辛子黑蒜拉麵，一食好香蒜味，啲面好快就入晒味，麵體好有咬勁，湯底亦都好濃味，不過我自己係比較鍾意食黑豚拉麵！最後叫咗一個海老餃子，我覺得好足料，雖然細細舊但咬落去好多蝦！又香口，下次都會再叫呢個！整體來講都好食，會再有下一次👍🏻