九記牛腩

營業中

休息中

不嬲相信盛名之下無虛士，不過今日一試九記，大失所望。下晝三點幾殺到，店前已有小人龍。不過稍等十分鐘就入得。呢度嘅伙記，稟承香港四大奇食嘅作風，對客人基本上頤氣指使，毫無侍客之道。當然，比之澳牛，九記服務當然算係非常周到。奇食之風應該係“我有美食，你俾我hi auntie都要照食”，不過九記今次好似唔係幾做得到。入到去一坐落就同澳牛差唔多咁迫，同坐有一對中國情侶同一個日本家庭。點咗個上湯牛腩伊麵同凍奶茶：奶茶不值一提，垃圾水平。到重點嘅腩伊。牛腩非常瘦，好少肥。咬落好老身，甚為韌，口感非常差。不過牛味幾重。唔算食唔落口，但以九記之盛名嚟講，完全唔合格。伊麵冇煮得太淋，口感甚好，不過此屬一般水平，不值一晒。個湯味厚而清，算係唔錯。會搵日再試，睇下佢係浪得虛名，定係一時失手。p.s. 同枱日本小妹妹嗰碗有cockcroch於其中 希望九記可以做得乾淨少少，唔好影衰香港。