Poseidon Restaurant & Bar (已結業)

今日同朋友去咗尖沙咀行街，行到攰攰地開始搵嘢食，諗住上OpenRice望吓附近有咩推介，無意中發現一間餐廳酒吧非常吸引，所以即刻去試吓。Poseidon Restaurant & bar 餐廳氣氛非常浪漫,而且主要係卡位,坐得非常舒適。海鮮船 淨係個賣相已經好吸引，一隻船裝住一杯杯食物，用燈光打埋去，五光十色，非常耀眼，淨係賣相都贏晒。生蠔杯，生蠔入口味道好鮮甜一而且仲係好爽口，加上一杯裝住一隻生蠔非常特別，𧐢身比較厚，有少少海水味。味道鮮甜，完全唔需要其他調味。蟹肉醬汁鮑魚蟹籽杯，蟹肉口感爽口彈牙，加上蟹籽嘅鮮味，完全將鮮味道提升一個層次。金箔魚子醬泰式蟹肉杯，蟹肉味都已經鮮甜，加上魚子醬令到味道層次非常豐富。炸脆豬手，豬手份量好多，仲要炸到熱辣辣，外面炸到脆卜卜，入邊嘅肉質仲係好嫩滑多汁，每一啖豬手都非常有口感，加上調味啱啱好，味道又香又惹味。龍蝦扁意粉，半隻龍蝦係意粉上面，龍蝦肉爽口彈牙，意粉做到啱啱好軟硬度適中，意粉吸收到龍蝦嘅鮮味，味道鮮甜，所有味道配搭得剛剛好，值得一讚。係尖沙咀搵到一間咁好味嘅西餐酒吧，下次一定會同朋友嚟再幫襯。