檳城風味 (已結業)

星期六喺鰂魚涌搵嘢食會發脾氣，好多都唔開，行吓行吓發現呢間幾吸引，走入嚟試吓。好簡單嘅一間小店，老婆落單，老公負責預備食物，四圍都係高檯，可以立食或外賣。四邊嘅牆印咗檳城嘅特色建築及壁畫，諗起舊年喺檳城，好熱好熱... 如果嗰度都好似呢度咁，抬頭就有兩部大冷氣吹住自己....海南雞飯 ($55)驟眼睇，咁少雞嘅？但原來分兩層放，上面嘅係雞連皮嘅脾肉，下層係雞胸肉；豉油、薑蓉另上，係真係全薑但唔辣，不過太細，要問老闆娘再攞多一份！雞油飯粒粒分明，撈埋薑蓉食當然係不得了啦！雞肉都幾嫩滑，不過雞味欠奉，唔緊要啦，$55包埋湯及飲品真係好抵食馬拉盞雞翼 (3隻$24)3隻即炸嘅雞翼，擺咗一陣都仲好熱！層皮非常鬆脆，咬開雖然肉質唔算鮮嫩，但好juicy，香口惹味！例湯今日係西洋菜雞湯，有一堆西洋菜食，清甜潤喉冇味精薏米水雖然薏米份量夠多，但係偏甜以呢個價錢嚟講，食物質素都不錯，值得一試！