海南少爺 (已結業)

海港城匯集咗各國餐廳美食，今日見終於唔洗等位，就決定試吓呢間星馬餐廳！餐廳裝修為典雅藍調，配以落地玻璃嘅海景，喺夜晚更加迷人。不過海景位今晚已經滿咗，揀左近門口嘅枱，位置相當闊落舒適。我見combo幾吸引，一次過有齊兩樣我鍾意食嘅嘢，毫不猶豫就簡咗個招牌海南雞油飯併馬來西亞肉骨茶，朋友就話要試個星州鹵水拼盤同鹹蛋黃魷魚。餐廳提供荔枝味嘅熱茶，感覺幾新鮮；睇完餐牌見飲品好吸引，又叫多咗杯熱帶雨林同柑香蜜雨。餐廳上菜速度都幾快，轉個頭已經有得食！招牌海南雞飯併馬來西亞肉骨茶一上枱，已經聞到肉骨茶嘅香味。呢個係藥材底嘅肉骨茶，足料，味道濃郁得嚟又唔會太鹹。海南雞嫩而唔肥膩。鹹蛋黃魷魚有咬口又唔會靭。鹵水拼盤份量都幾多，分別有豬手、花生雞腳、流心蛋同豆腐。整體唔會太鹹，仍然保留各食物原有味道。當中，流心蛋個蛋黃真係令人回味；而朋友就特別喜歡鹵水花生帶點本身花生嘅甜味，食到停唔到口。兩杯「雨系」飲品顏色鮮艷；熱帶雨林帶有陣陣菠蘿同石榴香味；柑香蜜雨就帶點酸味，非常開胃。窗口位唔係太多，如果要睇夜景就記得提早訂位喇！