人和月雞煲火鍋店 (已結業)

餐廳環境寬敞舒適，近窗邊嘅係六人卡座，地方相當整潔。調味料區域應有盡有，雪櫃亦都有無限量嘅飲品供應，比較特別嘅係餐廳會有自家製洛神花茶、菊花露等一類飲品，夠哂健康。呢度嘅食法有別於一般嘅任砌打邊爐，首先會嚟個頭盤，可以揀雞煲或者酸菜魚，之後會再換過個湯底打邊爐，唔會好似出面咁就咁加湯，溝到個味道淡哂，有雞煲又有火鍋，一次過滿足哂兩個願望。前菜雞煲揀咗韓式芝士雞鍋，味道酸甜平衡，加上面頭有海量嘅芝士覆蓋，絕對唔比城中有名嘅韓式烤雞餐廳遜色。藥膳養生牛奶鍋，食完雞煲之後就開始轉湯底打邊爐，湯底呈奶白色，香氣非常誘人，藥膳味道濃重，睇嚟相當滋補。點菜後侍應先送上一盤靚牛肉，分別係高級雪花肥牛、嚴選牛下肩、牛板腱、精選金錢展同埋特級牛胸爽，其中雪花肥牛油脂豐富，牛下肩同牛板腱有好重嘅牛尾，牛胸爽口感特別，值得一試。另外火鍋料裏面比較出色嘅係鮮蝦同埋粟米餃，前者爽口彈牙重任叫任食，後者內餡飽滿，令人非常滿足。