真味鮮廚 (已結業)

雖然炎炎夏日，但係都好希望可以同朋友圍爐取下暖。今晚就去觀塘食火鍋，揀咗個海鮮火鍋，超級豐富，成個套餐之多元化，令我哋非常滿足。首先係一個雞煲，辣辣地但係都可以接受，而且加入大量芫荽同洋蔥等爆香，非常惹味。再嚟一個刺身拼盤，拼盤賣相震撼，鮑魚、三文魚、帶子、甜蝦，希靈魚等等，真係一啲都唔失禮。然後就係主角海鮮火鍋。其實平時食火鍋我都係比較鍾意牛肉，各種嘅丸，但係今次嘅主打係海鮮，所以有大大隻嘅龍蝦，再有大量嘅龍躉同白鱔。我平時唔鍾意食白鱔，但係今晚嘅白鱔係令我回味無窮，我哋都覺得白鱔非常之有咬口，煙韌嘅感覺就好似充滿着骨膠原一樣，非常滋潤。當然仲有一盤排得非常整齊嘅肥牛。因為係任食火鍋，所以我哋都額外嗌咗一啲蔬菜，飽滿嘅水餃，芋頭同淮山等等。飲品亦非常多元化，我揀咗洛神花茶，滋潤一下，亦都放縱飲下汽水。好開心同朋友相聚，吃吃喝喝，談笑風生又一晚。