真味鮮廚 (已結業)

朋友推介真味鮮廚都好抵食，有刺身，龍蝦海鮮同雞煲都係每人三百左右，所以今日一於去試下，如果揀肉蟹拼盤每人再平多三十添☺️刺身拼盤，有吞拿魚，三文魚，帶子，鮮蝦，磯煮鮑魚，各款都新鮮鮮甜，鮑魚醃得入味，口感彈牙，最愛係帶子，啖啖肉，鮮甜！食完刺身後就會上重慶雞煲雞煲，雞肉煮至八成熟左右，再加熱多一會，再將醬汁芫荽芹菜撈勻就可以食。雞肉都嫩滑，件件雞都沾滿麻辣醬汁，非常惹味，辣辣地刺激一下味蕾。食完雞煲後就開始打邊爐，我哋點了沙地瓜瑤柱湯，再來就係超吸睛嘅龍蝦海鮮拼盤，拼盤有扇貝，鮮蝦，魚，卜卜蜆，龍蝦，青口，聖子，除咗青口和扇貝是急凍貨愛，其他都係新鮮即劏，龍蝦蝦肉原條起，好彈牙，卜卜蜆好嫩滑，魚肉雪白，聖子超爽口，分量足夠四個人食。每人都會有一隻巨型水餃🥟，脹卜卜，皮薄餡靚。四人有一碟大嘅安格斯肥牛肉，牛味濃，淥耐左都唔會好嚡口。仲有其他火鍋配料仼食，有蔬菜🥬，響鈴，炸魚皮，鵝腸，鴨血，蝦滑，韓國拉麵等汽水啤酒自家製涼茶仼飲，食完以上咁多嘢其實已經飽晒，都可以唔洗再叫其他配料，今日真係好滿足。