百份百餐廳 (天平商場)

營業中

休息中

富園執左後就變左百份百喇，新進快餐店。第一次黎望望，當然要睇清楚個 menu 啦 ﹗以快餐店黎講，佢地既菜色多到嚇親我 ﹗中、港、台、日、意、印、等等。發現好多菜色都話攞奬，又話出名，係咪真架？咖哩、叉燒、蕃茄都好出名？凍齋啡走甜，正常味道，快餐店質數，合格。海南雞飯套餐配油味飯例湯，話晒第一次，試樣簡單既先啦 ﹗最緊要穩陣。蘿蔔，嘩 ﹗唔係掛，一咬即吐 ﹗又苦又澀又有渣 ﹗劣 ﹗青紅蘿蔔豬骨湯，噢 ﹗好清純呀，淡如水。睇落好多料，但水汪汪，居然要我自己加鹽，師傅唔記得落鹽？海南雞飯，點解會用鹽水雞呢？海南雞應該係白切雞黎喎，點解變左咸雞架？好采都唔難食，雖然無咩雞味，質地都夠腍，髀肉都滑，又唔係太肥，咸雞配上薑蓉同油味飯都幾好味。飯帶微微雞油香，又唔係話太濕，滿意。